السلام عليكم زوار البلوجر الكراام..
النهارده جايبالكم كتاب من اجمل الكتب الساخره الموجوده الان وانصح الكل بشرائه..
اللى بيحبو الكتب الساخره والضحك بس..
كتاب بالطو وفانله وتاب
كتاب يحكيه الطبيب احمد عاطف من مواقف شخصيه حدثت له ف الوحده الصحيه
جايبالكم موقف بس والباقى هتلاقوه ف الكتاب
تعالوا نشوووف....
فى يوم جديد من أيامى بالوحدة الصحية وبينما أنا عمال أمضى على ورق جايبهولى الاستاذ خميس مسئول الصيانة ... لقيت شاب ثلاثينى و أمه كدا داخلين عليا.... قالى حضرتك المدير المسئول ؟ ..... قولتله أيوة أنا ابتسامة عدلى منصور * ... قالى طيب أحنا كنا عاملين شهادة ميلاد هنا لأبنى بقالنا أسبوع وعاوزين نغيرها ؟ .... قولتلهم تغيروها ازاى يعنى مش فاهم !! خامتها وحشة ؟ : D ...
قالى : لأ عاوزين نغير أسم الواد ... قولتله : نعم !! ... أسم الواد اللى هو ازاى يعنى !! ... هى الحاجات دى فيها هزار !! ... أنتوا سمتوه وخلاص ...
رد عليا بمنتهى البساطة وقالى : أصل احنا سمناه ( غندور ) على اسم أبو أمه ... بس بصراحة الناس قالتلنا الاسم دا قديم وابنك هيتعقد منه .... قولتله : طيب هو يعنى محدش قالكم كدا قبل ما تسموه ليه !! .. رد عليا وقالى : أصل الموضوع جه فجأة كدا مكناش مرتبين حاجة ...
قولتله : نعم جه فجأة ازاى !!! هو مش فيه حمل 9 شهور !! ولا كل دا كنتو فاكرينه قولون عصبى ؟ .... قالى : مش القصد ... اصلنا كانا عاملين سونار والدكتورة قالتلنا انها بنت واتفاجئنا كلنا انه واد .. واستسهلنا تانى يوم بقى وقولنا نسميه ( غندور ) وخلاص ~ ~ مش فاهم أنا لو مكنوش استسهلوا كانوا سموه ايه .. رياض السنباطى !!
قالى المهم احنا عاوزين نغير الاسم دا لـ (مازن ) يا دكتور ...قولتله : مش هينفع عشان خلاص احنا بعتنا الاسامى لمكتب الصحة ف المديرية ولو عاوز تغيره روحلهم بقى مش عندنا ..
وقعدت أقنع فيه .. وهو مش بيقتنع .. أقنع فيه ... وهو مش بيقتنع ... وبعد تلت ساعة حوار ... قالى يعنى مش هينفع بجد خالص نغيره لــ ( مازن ) من هنا ؟؟؟ ... فقولتله : لا والله مش هينفع نغيره لــ (مازن ) للأسف .. لازم من مكتب الصحة
وخلاص بقى بيقوم عشان يمشى .....ففجأة الاقى امه الحاجة الطيبة تنطق لأول مرة من بداية الحوار ... الصراحة أنا كنت فاكرها خرسة أو مش معترفة بيا كمدير أو ككائن حى بوجه عام .... حضرتها بعد كل الكلام والحوار دا قالتى : " طب سمهولنا (محمد) طيب " ! ~~ هااااااااار أسود !! .. هو أى مصلحة و خلاص يا حاجة !!
منقول من الكتاب
ارجو ان ينال اعجابكم..........
