الجمعة، 4 ديسمبر، 2015

PDF,تحميل كتاب رحلتى من الطب الى الالش ل محمد بن جمال الشهير بجيمى,حصريا

الكاتب: elstat omhaya   بتاريخ:  1:45 ص   رحلتى من الطب الى الالش

النهاردة جايبالكم كتاب من اروع واجمل ما قرات خلال الفترة الاخيرة وهو كوميدى ساخر هو كتاب رحلتى من الطب الى الالش ل محمد بن جمال
والكتاب يحتوى على مواقف ساخرة وبشكل كوميدى تعالوا نشوف شوية الش ويارب يعجبكم...
...............
...............
.............

دايما باخد القرار المناسب في الوقت غير المناسب ... بفضل اتلكع لحد ما الفرصه تضيع مني مع اني علي طول عارف اني لو حبيت اعمل اي حاجه هعملها
من شويه بعد ماخلصت شغل قررت اني لازم انزل احلق ... انا بقالي 4 شهور في صراع مع الموضوع ده ... بس قولت خلاص انا لازم اقطع الفروه في البسين ولازم انزل احلق
نزلت روحت للحلاق اللي دايما بحلق عنده ... الحاج ابو امنيه ... الراجل الطيب اللي مستحملني بقالي 10 سنين لقيته قافل ...فقولت اكيد يعني محدش بلغه اني جاي وقاله الحق اقفل
لفيت علي اربع ولا خمس حلاقيين لقيتهم كلهم قافلين ...قولت يبقي في حاجه غريبه ... ياتري امي بلغت المنطقه عشان الحلاقيين ياخدو حذرهم ويقفلوا ؟ ولا حصل ايه
زعلت اوي وقعدت ماشي ادور علي اي حد احلق عنده ...منا خلاص اخدت القرار ... ومش عاوز افقد الامل ...بس وانا ماشي افتكرت ان النهارده الاتنين !! والاتنين اجازه الحلاقيين فجالي احباط وزعلت ..يعني دونا عن ايام ربنا كلها يوم ما انوي احلق انوي يوم اتنين والساعه 11 بليل !!
المهم وانا ماشي لمحت محل صغير كده ..يدي علي انه محل حلاق .. قربت منه لقيته كاتب بخط صغير كده "صالون حلاقه " وفيه راجل عجوز ... قولت بس هو ده اللي هحلق عنده ... انا محتاج راجل كبير وخبره عشان يعرف يحلقلي ...يحلقلي شعري قصدي
دخلت لقيت راجل عنده فوق الستين سنه ...اول مادخلتله لقيته بيقولي خير يابني
قولتله خير يا حاج ...عاوز بأتنين جنيه عيش فينو ... قالي نعم انت بتهزر !! قولتله اصلي داخل محل حلاقه هبقي عاوز ايه يعني ؟! وداخلك بفدان نجيله فوق راسي ..فأكيد جاي احلق يعني
قالي اه ... قالي طب ينفع تجيلي بكره ؟! ..فقولتله ليه مانت فاتح اهو ومفيش حد !!!
قالي اصل نضاره القرايه بتاعتي لسه مكسوره ... ومبشوفش من غيرها !
قولتله نضاره قرايه ايه يا حاج ؟! هو انا بقولك فليني ؟! ولا ذاكر في شعري ؟! ده انا هحلق يعني هتشيل شويه من فوق علي شويه من الجناب ... مش عاوز قصه حسن الشافعي يعني
قالي اعذرني يابني ... تعالا بكره ...قولتله ماشي يا حاج ..ولا يهمك ...وروحت اجيب حاجه من اخر الشارع ...وخلاص فقدت الامل ... وقررت ارجع البيت لأمي
وانا راجع معدي عليه تاني .... قولت يمكن اصعب عليه وينادي عليا ... ببص بطرف عيني لقيته بيربط الملايه علي رقبه واحد تاني وهيبدأ يحلقله 
ساعتها اتصدمت صدمه واحده قفشت خطيبها بيشيش مع واحده في الداون تاون ... او بيشربوا موكا كراميل في ستار بكس ...
ساعتها عرفت يعني ايه حلاق يحلقلك من غير مايدب مقص في شعرك ...يعني ايه حلاق يحلقلك واي فاي

ـــــــــــــــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــــــــــــــــ
لسه شايف فيديو عباره عن تجربه عاملينها بالاتفاق مع الاهل ... الولد الصغير هيعدي من قدام واحد بيبيع ايس كريم فأبوه هيديله دولار عشان يشتري الايس كريم ... فيه قدام الراجل بتاع الايس كريم ده واحد قاعد ماسك ورقه مكتوب عليها " محتاج فلوس " و بيشوفوا الولد هيتصرف ازاي
فيه اطفال وهي واقفه شافت الراجل ...فكرت شويه ..وراحت اديته هو الدولار .. عشان شايفينه مبهدل وشكله غلبان ...
وفيه بنت مثلا راحت اشترت الايس كريم وراحت اديته للراجل ومأكلتهوش هيا
طبعا الاطفال دي اتصرفت بفطرتها السليمه ... وعشان اطفال متربيه ...وزي ما بيقولوا شبعانه ...بحكم بقي البلد ..او الاهل ... او ايا كان
احنا كلنا بنتولد بفطره سليمه .... التربيه الصح هي اللي بتحافظ علي جزء كبير منها ...
قبل كده برضه ...وانا في سنه تانيه كليه ...فيه قدام الكليه كنتاكي ... قدام باب طب اسنان ...المهم اليوم ده خلصت متأخر ودخلت اكل اي حاجه جوه ...وطبعا معايا الانتينال والفلاجيل اللي هاخده بعد الوجبه ‏‎ اكلنا جوه وخرجنا ... قابلني واد صغير عنده حوالي 5 سنين ... جاي يقولي اي حاجه يا باشا ... عاوز اجيب حاجه اكلها ...
فقولتله بص انا صرفت كل اللي معايا ومش معايا غير النص جنيه المقطوع ده ...ومش عارف هروح ازاي - كان ساعتها النص جنيه ورق - فبقوله مش معاك انت اي حاجه عشان اروح بيها ؟!
قالي اه يعني عاوز كام ؟! فبقوله اي حاجه اروح بس انا بيتي بعيد ... ومحدش هيرضي ياخد النص جنيه ده
قام مطلع من جيبه خمسه جنيه ...وقالي تاخد دي ؟! قولتله ياريت وهدعيلك ...قام مديني الخمسه جنيه ... فبقوله اخدها وامشي ؟! قالي اه عادي ...انا معايا غيرها
فقولتله طب ياعم انا بهزر معاك ... امسك الخمسه جنيه بتاعتك ...قالي والله ما هخدها ..وطلعلي من جيبه فلوس وقالي انا معايا اهو غيرها ... وجري وسابني
وفضلت انادي عليه وهو فص ملح وداب ... انا كنت متنح كده وفضلت واقف قولت هيجي ياخد الفلوس مثلا عشان عملتها قبل كده برضه مع واد تاني واديت للواد فلوسه وعليها فلوس . او قولت ابوه هيجي يقولي هات فلوس الواد يا حرامي ...او اي اكشن هيحصل ... هيبعت يجيب اهله من البلد ...بس محصلش كل ده ...والولد مرجعش .... وفضلت محتفظ بالخمسه جنيه فتره طويله ...وبعد كده ضاعت مني للأسف
...مش عارف هل الواد لما كبر وافتكر الموقف ده قال ...الهي ماتوعي تصرفها ؟! ولا عشان فلوس الشحاته مابتدومش ولا ايه بالظبط ‏‎
ومش عارف ليه الواد صعبت عليه ...هل بعرف امثل ...ولا شكلي يدي علي ان غلبان ومتشرد فعلا ‏‎ بس كل اللي متأكد منه ان الواد كان شايف اني محتاج وانه لازم يساعدني مدام معاه فلوس تانيه اكتر منها ...واداني خمسه جنيه ... وده مبلغ كبير بالنسباله ...مش نص جنيه عشان يمشيني ويخلص مني 

ــــــــــــــــــــــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــــــــــــــــــــــ


=برضه نسيت عيد الحب ....ما انت علي طول كده مفيش اي اهتمام
-بس يا حبيبتي انا ....
=بليز ماتقاطعنيش ..انت كنت زمان مهتم في اول علاقتنا واول ماتخطبنا خلاص بقيت بتنفض ... ولا في دماغك ...حتي في عيد ميلادي اللي فات كنت ....
-استني بس ..منا في عيد ميلادك قايلك كل سنه وانتي طيبه وخرجتك وجبتلك هديه !!
=انا مقولتش حاجه انا بقولك ان عيد ميلادي اللي فات ... انا متأكده انك مفتكرتش غير لما الفيس بوك بعتلك وقالك مني و اتنين كمان عيد ميلادهم النهارده خش قولهم اي حاجه !
-ايه ده !! حرام عليكي ! ليه بتقولي كده !!
=ايوه يعني في حد يفتكر عيد ميلاد خطيبته وحبيبته يوميها ؟!
- امال اعمل ايه يعني !! انزل احتفل بوقفه عيد ميلادك واضرب بمب وصواريخ تحت بيتكم ... ولا اخد اجازه 3 ايام من الشغل عشان احتفل بيه ؟! حبيبتي ده عيد ميلادك مش عيد الاضحي يعني
=كل حاجه كده تقلبها هزار وتريقه ...احمد انا مايفرقش معايا هدايا والكلام ده ... انا كلمه بسيطه ...او ورده ...او بوست عني يجيب تلاتين لايك بالدنيا ومافيها ..احمد احنا البنات بسيطه اوي ... بس انتوا اللي مش فاهمنا
- خلاص بقي يا حبيبتي انا اسف ... وعلي فكره انا منستش الفلانتين ..
**بيفتح الشنطه وبيطلع هديه ملفوفه **
=الله ايه ده ؟!
-ده موبايل جديد ...بدل اللي اتسرق منك ..عشان متمشيش تاني بالنوكيا ابو كشاف ده
=الله ...ده ال iphone 6 بلس اللي نفسي فيه ؟!
-لا هو مش 6 بلس
=مش مهم يبقي iphone 5s ..هو صغير شويه بس قشطه
-هو في الحقيقه مش iphone اصلا ... ده موبايل جديد هاواوي لسه نازل ... هو مش غالي بس سمارت فون يعني فيه واتس اب وفيسبوك ... لحد بس ماربنا يكرمني واجبلك اللي انتي عاوزاه
=مممممم عِده صيني يعني
- عِده !!
=علي العموم شكرا بس ... انا كنت فاكراه اي فون ...اصل يسرا صاحبتي خطيبها جابلها اي فون ...يلا الحمد لله انا عارفه حظي قليل في الدنيا
- ...........
‫#‏العده_معهاش_اسكرين_بروتكتور_ياحمااااه‬
‫#‏مش_مهم_هديه_كفايه_ورده‬
‫#‏حبيبتي_جبتلك_ورده‬ ؟! ‫#‏طب_شيلها_من_قدامي_بدل_ماحطها_في_عينك‬
‫#‏السنجله_جنتله‬
رحلتي من الطب الي الألش


منقول من كتاب رحلتى من الطب الى الالش ل محمد بن جمال

تحميل كتاب رحلتى من الطب الى الالش ل محمد بن جمال,قراءة اون لاين لكتاب رحلتى من الطب الى الالش ل محمد بن جمال ,PDF  تحميل كتاب رحلتى من الطب الى الالش ل محمد بن جمال,

معلومات كاتب الموضوع

اتمنى ان تقضوا وقت ممتع معنا شاهد جميع موضوعاتي: شوشو

إلى الأعلى ↑
كن على تواصل واتصال معنا

Google+ Badge

نجوم اف ام 100.6

المتواجدون

إجمالي مرات مشاهدة الصفحة

Google+ Followers

© 2014 حظك اليوم. تصميم من http://www.el6tat.com/
حظك اليوم. تدعمه Blogger.